狗狗突然狂奔亂跑？

間唔中都會有人問：「我隻狗成日好似上左電咁係屋企橫衝直撞，有無問題架？」

呢個現像其實都有個學名的，叫做 Frenetic Random Activity Periods (FRAP)，指既係狗狗訓係到好地地，突然好似上左身一樣狂跑﹑狂跳﹑狂咬野﹑狂轉圈等等… 總之就係突然做出一連串好誇張既活動，持續時間可以由分零鐘到幾分鐘不等。

點解會出現 FRAPs？因為狗仔好多時所謂的放電不足，即係刺激不足，太悶佢就會利用呢個方式自行放電。假如你同佢有足夠既運動量﹑家居環境豐富做得好，佢身心刺激都足夠既時候，就會比較少有呢個現像出現。

FRAPs 本身係正常﹑完全無問題而且係一個健康既釋放方式。不過有部份狗係呢段期間，會亂咬屋企野的，或者對於屋企細同狗狗體型較大既朋友來講，有時都會係一個困擾。

假如想減少呢類情況從而減少對家居既破壞，一般都係做返足身心刺激就夠。

體能上既刺激… 好簡單，即係跑下步﹑玩下接波執野，總之就要佢唔洗用腦地跑來跑去消耗體力。

心理上既刺激… 主要係放狗時比佢多聞唔同既野，或者係屋企同佢玩下聞野搵食既遊戲，又或者比藏食玩具比佢地自己解決問題搵食，已經好好了。得閒同佢地做下有一定難度既訓練都係一個好理想既心理刺激。

FRAP 係正常，但當 FRAP 好經常地不斷出現或者開始左狗仔好難停落黎，咁就要留意了。到時你要睇睇到底佢係太悶引發 FRAP，定係因為其他精神病症如強迫症等等令佢不能控制地作出呢類行為。

不過一般比佢地亂跑亂轉都無傷大雅～大家拎起手機拍下片仲好。