聲音敏感的影響

最近做多左室內唔同原因甚至搵唔到原因既攻擊既個案，以前我都唔會特別問，而家開始會問埋：狗狗會唔會好怕聲音或突然郁動既野？同推測一樣原來好多都真係會的。

早前寫左篇有關 Trigger Stacking 既野 (https://www.facebook.com/BambilandHK/photos/a.697681230324458.1073741828.459610990798151/1760063024086268/?type=3&theater)，其實都係的。一隻對聲音或郁動超級敏感既狗，好多時佢地隻杯本身已經裝得好滿，所以只要有好少額外佢地唔鍾意既野，就會馬上爆發。甚至個聲音再大多少少咁岩有人企係隔離就會爆發，連原因都好似搵唔到。

如果只係單純護食或護物既個案，其實都唔係太複雜，算係最直接可以處理而難度又唔係太高既攻擊行為問題。不過如果夾雜左其他野，難度就會高好多好多倍。

做任何訓練，都會有一個大致既計劃方向，跟住唔同的參數去執行。單純的護食問題，做完A就B跟住就C，好順利的。但假如夾雜左其他問題，好多時做 A已經有機會比較難入手要退後好多了，然後當你做到 C 好似好順利既時候，突然門外有聲，然後佢就會所有野都錯晒。呢個時候留意唔到唔識停或退的話，狗仔又會由訓練變成多左一次重覆錯誤模式既機會。

一般而家如果知道狗仔會對聲音敏感，我都會選擇集中處理左外在野先，將狗仔整體狀態穩定左再搞其他。可能過程會慢少少，但對主人既安全同埋要求都低好多的。當然同步都會視情況可以開始主要 trigger 的處理，但一定會比正常慢好多好多。

咁樣做並唔係為左 dum 波鐘呃學費，搵過我做訓練既朋友都知道我情願收少你一堂錢，都希望慢慢 guide 你地去做到，真係唔掂或有乜特別野需要上門review 的話先上門的。

如果一隻狗好似做完左本身個問題，但隔離無啦啦有人跌左包薯片落地然後隻狗又再次爆發的話，咁樣做其實無乜意思。

最後，更重要既係，有 noise sensitivity 問題既狗，如果唔留意或唔去處理的話，佢地既人生係辛苦的。因為訓又訓得唔好，然後訓醒之後基本上不停會有野令佢地好驚，有時大聲少少仲會驚到彈起。將心比己，咁樣既狗生唔係好事。

明既就會明，唔明既我其實都唔會迫人去明。共勉之。

至於點樣處理聲音敏感既問題，一般都不外乎利用外在方式配合減敏訓練。

1. 有閒情時間既主人可以加強室內隔音，減少外來聲影響狗仔

2. 盡可能減少發出不必要高頻嘈吵聲音，未完成訓練前避到就避

3. 利用 Adaptil 或 Pet Remedy 之類外在物質令狗仔相對穩定少少，但並唔係完全消除個壓力

4. 利用訓練方式提高狗對聲音既接受程度