柴犬個性簡介

柴犬係其中一種原生犬種，整體DNA排列結構同狼都係咁多犬種之中最接近狼。加上日本人鍾意保留原汁原味的柴犬，無論行為上或外觀上，所以柴犬係保留左好多狗應有既本能行為；有唔少既性格特質都會係相對原始比較野性。亦有好多人話柴犬唔適合新手，其實養柴犬你需要既係好事前預備同埋大量訓練﹑社交化，如果係一個肯學肯試既新手，絕對比一個唔願改變既所謂老手來得理想。

一般無論你睇邊到既大型狗會，對柴犬既描述大致都係：忠心﹑勇敢﹑威武﹑穩定。不過睇下就算喇，因為睇完都唔知到底係乜亦唔係實際既野。

＊個性＊

有人話柴犬比較倔強，其實只係柴犬需要更多既訓練去令佢地變得穩定。

一隻正常既動物，係面對威脅／恐懼既事物果陣，一般會有兩個基本選擇：逃走或攻擊令對方逃走，目的在於拉遠距離。柴犬算係個性比較剛強既狗，普遍都會選擇以攻擊作為呢個手段。相反其他牧羊類或工作犬類既狗，係漫長既選擇性繁殖後，一般專業繁殖者都會揀比較離開現場／溫馴既作繁殖。所以易唔易攻擊與否同體型無關。

有唔少人話柴犬唔打得，會越打越惡。好大部份都係正確的，因為佢地會比較偏向利用攻擊去處理威脅同壓力。

＊本能行為＊

保護自己資源 (Resource Guarding)，一般可以被保護既可以有食物﹑骨頭﹑玩具﹑特定空間﹑異性﹑甚至係主人。呢種行為係野外係佢地生存關鍵，但去到同人類共處就會變成一種問題。保護既意思係，佢地好怕其他人／狗接近佢地所保護既野，一旦接近就會視之為威脅，然後攻擊。

一般護野的行為理應係所有犬種甚至貓都會有的，但有部分因爲人為繁殖既關係就可能無左或變得比較弱。不過柴犬係呢方面既本能保留得比較強，所以都有好大部份既柴犬或多或少會有呢個傾向甚至真係護緊。正常的，一般只要利用適當手法去處理，單純的 resource guarding 係最直接容易處理的攻擊行為。

護野可以好輕微﹑亦可以好嚴重好恐怖。最好當然係佢未有問題或只有輕微傾向時進行預防式訓練，會輕鬆簡單得多。

另外一樣比較麻煩既本能行為，就係肢解獵物 (Carcass Disecting)。如果你買左隻毛公仔或比佢發現梳化裡面係有野可以扯到出來，佢地真係會好鍾意咁玩的。呢個亦係好多人覺得好困擾既問題。

最後就係柴犬係遊戲之中，會重演練習大部份捕獵同交配所需要既本能行為：追逐﹑撲咬﹑摔角﹑拉扯﹑騎乘等等。所以柴犬玩耍時會相對地粗魯。

柴犬 BB 階段利用輕咬去開始互動 (play bite) 基本上一定會遇到；但呢類咬絕對不帶任何攻擊性而且係友善的，只要及早了解並利用正確方式應對，基本上問題還未成形就可以被引導到正確的行為模式。