怕雷雨 Storm Phobia 應對

早前有人 PM 問狗狗行雷超驚可以點搞… 一般單以訓練去做怕行雷閃電，其實好難。我地可以重覆模擬做減敏既只有閃光同埋聲音；但雷雨前既氣味﹑氣壓變化就完全唔可能模擬到，呢兩樣 precursor 往往好早就令狗開始驚左。當然照做閃／聲既減敏係會有少少用，但唔係咁易的。

一般要幫狗仔行雷時定驚… 都需要靠少少外力；可以分為物理上既或者幫狗仔調節身體裡面狀況兩種…

物理上既即係大家好常聽既 thundershirt 或繃帶大法。呢類透過增加 point of contact 去企圖令狗覺得有安全感既做法作用有限而且唔係隻隻work，如果對外來物件接觸比較敏感既狗，就可能會用完仲差左。

主人去哄下陪下，或比個位佢地自己走避下都係物理性質令佢地增加安全感的做法。

然後就到調節狗狗本身既野… 由溫和到比較勁既大約係咁排。

－ 利用 Adaptil collar / diffuser 之類，可以令狗定少少少少。不過效用好細，可能由100分既驚變做95分既驚，係有好到的但未必係可以觀察到既轉變。

－ 利用口服 Remedy，即係 Pet Remedy 或 Bach Remedy 之類。都算係溫和既野，但相對地都係比較溫和，但比 Adaptil 之類會好少少。

－ 利用口服 CBD，會幾明顯的，但對於好驚既狗都可能仲差少少。

－ 最後就係服用藥物，可以向你既獸醫做咨詢，一般獸醫都會有藥令狗仔短暫地比較放鬆的。如果狗仔真係極度驚青既，可以考慮藥物減敏既方式去處理，咁狗仔就可以慢慢係藥物輔助下利用真實雷聲去做減敏。不過呢方面需要搵獸醫行為學家做咨詢，一般獸醫係唔會做或未必識搞的。香港 VB 有 SPCA 果位，而我地合作開台灣既就係 ＠會思考的狗寵物行為訓練矯正工作室。

雷雨季又來，呢類文章每年都係要出一次。

真係乜都用唔到，就行雷時多陪狗仔﹑開下音樂﹑點下香薰﹑同佢玩下食下訓下覺﹑攬下錫下乜都得啦，最好當然如果佢想的話就可以有位比佢自己走動或匿埋，會更理想。

驚慌係一種情緒反應，係唔可能透過獎勵增強的，好基本既行為科學。而怕雷係本能行為，亦唔關咩服唔服從領唔領袖事，領袖本身都可以怕雷的。