屙尿。

特別鳴謝：Austin 訓身演出經典屙尿場面。

今日想講既係屙尿既問題，亦係好多新手﹑中手﹑老手主人經常會關心既問題；亦係攻擊問題以外最經常令主人想搵 trainer 既原因… 今日講既唔係訓練方式，而係唔同既屙尿。

正常既屙尿，可以分為三種：「堅系屙尿」﹑「興奮到瀨」同埋「霸地盤式 Marking」。

堅系屙尿即係… 急就要屙，無野可以唔明。而 marking 就係一種地域性既行為，可以係霸地盤﹑亦可以係話比同類知自己係呢到出現過既方式。一般都係聞一聞有味，然後就屙返少少。所以主人成日話：「佢屙清無晒尿唔會再屙架喇」，呢到只係岩左一半，佢的確唔會再屙尿，但佢一樣會 marking。過份沈迷 marking 既狗係無晒尿﹑屙到出晒血都仲可以 mark 緊。

一般教式佢屙尿，唔代表已經教識埋佢要係正確位置 mark，係兩樣野來的，但教法基本上一樣，只係佢地係兩樣野所以要分開教兩次。

至於興奮到瀨，一般係未成熟既幼犬都會有的，但正常一歲多就會慢慢減少同消失。假如狗狗去到兩三歲都依然有呢個情況，就可能要帶去睇醫生檢查了。假如只有全部主人外出後返屋企時先會興奮到瀨，就要留意會唔會係分離焦慮既問題。

跟住講下「屙錯尿」。對於狗來講沒有對錯，只係對人來講先有對錯。不過一般屙錯尿都可以又分幾種原因：

1. 真係未學識屙而屙錯

一般幼犬或無學過室內去廁所既狗，真係可以唔識的。而你要做既純粹係諗辦法幫佢設計一個點樣屙都一定岩既環境同埋規律，然後把握正確既機會進行大獎。重覆就會成功。做錯就當無事發生。

2. 尋求主人關注

有部份狗主人完全無做任何 enrichment 亦都有時會完全無時間理佢。當狗太悶又想人理佢果陣，有時就會因為壓力爆煲而屙錯左。第一次屙錯後主人往往都會理佢﹑鬧佢﹑或者打佢，然後佢就會學識「屙錯的話主人就會理佢！」打鬧都係一種關注，對於完全缺乏關注既狗來講，你理佢就已經夠，唔理你點理。如果係呢類既，請你多少少理下狗仔，或幫佢做好 enrichment，等佢有其他方式解悶。

3. 身體出現問題

假如狗仔已經好穩定咁學識廁所，有一個既定模式，而係陪伴佢既時間同埋環境亦唔悶，跟住佢有朝一日突然屙錯尿，咁狗仔有極大機會身體出現左問題，唔舒服令佢會屙錯或忍唔到尿。如果你既狗有出現突然屙錯既現場，係尋求任何訓練或解決方法之前，都應該帶佢睇獸醫同佢講聲做個檢查的！

行為往往反應身體狀況，有時忽略左呢類初期訊號，夾硬企圖用任何方式訓練佢去返岩的話，都係殘忍的。先排除身體狀況，再諗訓練。

4. 焦慮

假如身體狀況影響被排除左的話，剩低你要諗既就係焦慮問題。分離焦慮﹑環境焦慮等等，全部都會令狗屙錯尿的。而呢種屙錯尿，只要背後情緒唔能夠解決，就係近乎修正唔到的。亂屙尿都係一種表達焦慮既轉移行為。

就算係用正向式或高壓式既做法去處理 displacement urination，初期會有效，但好快就會見到大反彈，比之前惡化好多。

屙尿都好有學問，但慶幸既係而家無論正向與傳統既訓練師，都會叫人係狗仔屙錯尿之後唔好作任何打罵，最好就選擇當無事然後默默清理。

多留意狗仔既狀況，佢地唔識用語言話比你知佢唔舒服或佢好不安，但佢地既行為可以話到比你知。主人唔學唔留意的話，仲有邊個會理佢？