「冷靜」真的可以被教導出來嗎？

放鬆／冷靜／平靜 （calm / relaxed） 係一種情緒或精神狀態，代表緊無壓力﹑唔緊張﹑不受威脅﹑沒有情緒波動既狀態…

周不時都聽到唔少既訓練師講：你要教你隻狗平靜﹑放鬆… 其實，佢地教緊既只係叫隻狗面對任何情境都唔可以郁：無論係好與唔好既情況都係。開心興奮果陣要坐定定唔準郁先可以有好野；驚果陣要坐定定唔準郁唔準吠乜都唔準做先可以離開或逃走。

一般我地都會建議做好 impulse control 既訓練，即係講緊狗仔係有合理既等待同埋唔可以過份激動；但面對負面既事甚至係受威脅或驚慌既情境就唔太適用了。

狗仔面對威脅，最基本有兩個選擇：打走人或自己走。但呢類既所謂平靜式訓練，係教緊狗仔係任何時候都唔可以走﹑只可以死頂，唔係的話後果將會更陰公。可能會被打鬧﹑可能會被電﹑亦可能會被迫繼續面對唔想面對既野。試諗下一個驚蛇既人，因為唔夠冷靜而被迫繼續同條蛇相處落去直到永遠，果種情境幾咁痴線。

羅馬唔係一日建成的，就算狗仔先天遺傳到比較敏感﹑易於情緒失控，都唔會一黎就直接出事；好多時都係日積月累既既負面壓力久久揮之不去，然後就會開始出現問題。

狗仔係人類最好既朋友﹑狗仔有一個小朋友既智商，呢類冠冕堂皇既說話人人都識講。但當講到原來狗仔都有壓力﹑狗仔都會驚﹑狗仔都有情緒﹑狗仔都有機會被積壓到有問題，就好多人都選擇唔相信，覺得呢個講法係好痴線。無事果陣就當狗係朋友﹑係小朋友；出事果陣就當佢地係機器﹑佢地只係唔夠服從唔夠聽話。

真係愛錫小狗既，請考慮多少少佢地既感受。你有壓力﹑我有壓力；你可以自己有辦法去減壓，但狗就無；就算有都好多時會被禁止。

狗生活唔止吃喝溫飽，精神健康生活質素都好重要。共勉之。