狗對食物完全零興趣？

經常都會有狗主問：正向訓練主要用食物同遊戲做訓練。假如我隻狗對食同玩完全零興趣，應該點做？

首先我地需要理解一隻狗既各種需要係會隨住時間﹑地點﹑身體狀況而改變的。用模擬市民呢張經典既需求表就會好明顯。當狗極肚餓果陣佢一定會揀左食野先，當佢唔係太肚餓但悶到就快痴線，佢就會去左玩。佢呢一刻最需要乜野，好取決於佢本身既興趣同埋佢呢一刻最欠缺乜野。

有部份狗自小可能因為經驗或社會化問題，係會完全對玩樂無興趣的。不過對於一隻身心健康既狗，基本上就算佢唔係非常為食，都唔會話真係對食物係零興趣。

睇到呢到你可能會問：我隻狗真係乜都唔食，甚至連正餐都唔多食，點解？

一隻狗一般會對食物完全零興趣，主要有以下既原因，大家都可以循住呢個方向去搵搵個原因。咁樣對狗既身心都好的。

1. 身體健康問題

一般都要留意狗仔會唔會係健康上出左問題，可以由腸胃﹑牙齒問題到各類病症都會影響狗狗胃口的。如果狗仔剛剛完成左極大量既體力活動，或者係剛注射左疫苗，都可能會影響胃口甚至絕食。

2. 食物對於狗狗唔吸引

有部份狗非常揀飲擇食。可能會有特定肉類唔食，特定質感唔食，特定味道唔食，太肥唔食，太軟太硬唔食… 基本上呢個都需要試的，就同人一樣，喜好既野真係話唔埋。

3. 環境中有比食物更吸引既野

環境中各樣既野都有機會係食物既 competing motivators: 氣味﹑聲音﹑其他人﹑其他狗﹑新環境﹑玩具… 你講得出既都可能會係。如果狗仔非常熱衷其他野的話，幾為食既狗都有機會唔食野的。直至狗狗完全滿足左呢個更強大既需求之後，佢地就會恢復食野。呢個解釋左一半既狗點解出街就唔食野既原因。

4. 太無聊

有部份狗係會比較偏好 work for food，即係要有少少野做先有飯開，而唔係就咁一兜擺係佢面前比佢食。有一個現像叫做 免費食物現像 Contrafreeloading，大部份動物有得揀既時候都會選擇有少少野做先有飯開。當然如果動物處於極餓既狀態，佢地就肯定會揀左食野先。

如果你既狗現餵食玩具／尋寶時好好胃口，但一擺碗就唔食，咁好大機會係呢種。可以多嘗試用唔同方式餵食，佢地會好開心的。或者以一個訓練環節，同佢邊互動邊食。

5. 壞習慣

有部份主人平時都唔係太理狗狗，食飯時亦曾經因為狗試過唔食而用手餵，跟住就返唔到轉頭了。因為狗狗會知道唔食飯，主人就會關注佢。

一般人都會定時餵食同收碗，恨心幾日一般都可以解決。不過都有狗係唔能夠成功戒甩，呢個時候一般都會轉去第5點咁做。

6. 焦慮﹑驚恐

一般以上五點都唔適用既時候，就值得留意狗狗既心理狀態了。一隻狗如果處於焦慮或驚恐狀態，食欲會減少甚至完全唔食的。有部份狗對食物意欲較強，所以好驚時都可能會食，但都總會有一個位係驚或緊張到唔再食的。

由於心理狀態同食欲有關，所以先會話身心健康既狗一般對野食有興趣。

一般可以為狗構成焦慮或驚恐既野有：聲音﹑環境轉變﹑陌生人﹑其他動物﹑車﹑氣味﹑光影變化﹑天氣﹑獨處﹑太多人﹑郁動得太快既野﹑吸塵機…… 基本上即係乜都有可能係。如果狗狗係因為焦慮而唔食野，一般只要處理左佢既焦慮情緒﹑或將令佢唔舒服既野移除，佢就會恢復食欲。

有好多狗主都會忽略狗仔既情緒狀態，以為食物係萬能。往往諗住將狗一下就掉去一個好驚既情境，然後就用食物引佢。往往咁樣做會適得其反，甚至有機會令狗更加對食物失去興趣同產生更多焦慮。

對食物零興趣的訓練

如果係教新行為，一般主人都未必會浪費時間精力去做。

如果係要處理因負面情緒引起既行為，通常都會建議主人先搵出令狗狗失去食欲既原因，然後培養對食物興趣，再重新出發做訓練。咁樣做會慳好多時間同埋精神。

假如搵晒都真係完全唔知點解狗狗唔食野，咁就唯有做單純既減敏 Desensitisation。不過行呢條路進度會極慢，同埋刺激強度既控制要非常精準。