如何決定獎勵食物大小？

一般正向訓練主要會利用食物作為改變行為既學習動力，間中都會利用遊戲去做呢個動力，再間中都會利用動物本身已經有既行為去做獎勵。 不過對於學習新行為﹑或比較靜態既行為﹑或需要大量重覆先學得識既，一般都會用食物。利用食物有以下好處： －可以快速重覆 －簡單直接 －可以係動物處於靜態時作為獎勵 試諗下，假設我要由零開始教識一隻狗剛剛夠晒聽指令就 sit，最少都要重覆5－6十次，但如果要做一個穩固既訓練，可能最少一個 session 都重覆到一兩百次，長久以來可能要重覆成幾千次先會相對穩陣。如果我係利用拋波或扯大纜作為獎勵，我諗係狗學識之前，我隻手會率先頂唔順。 至於點樣揀食物？當然首要就係揀隻狗鍾意食既，佢地先會更願意為左得到獎勵而作出行為上既改變。咁大細呢？有無人覺得狗要越大舊越多越好？ 其實狗食野係狼吞虎嚥，食物係佢地口中停留既時間相對短。所以佢地會 prefer 食既次數多，多過大大舊。上面張圖係原先果舊鹿肉乾，下圖我將佢剪開左做3個 size。 一般做需要不停重覆既訓練（學習新行為﹑或改變現有行為模式），我地會選用狗狗剛剛好可以一啖就吞，唔需要咬既大細同食物（以我兩隻黎計係下圖最右）。咁樣就可以更快進行下一次重覆練習。當食物太大舊，佢需要咬好耐先食到的話，一來你需要更長時間先可以再重覆，二來狗仔好快會失去耐性。 假如你係做緊聯想類既訓練（改變狗狗對一件事既情緒反應），咁就要揀d 超正，大件少少既野食喇。咁樣佢地個聯想會鮮明好多。因為呢類練習唔需要不停快速重覆，所以如果用既野太過沽寒，反而會阻礙學習既成效。 睇完咁大段字，大家識揀未？ 正向訓練無乜行為上既副作用，佢最大既副作用就係食得太多變肥或肚屙。所以主人需要好好控制食量﹑訓練長短同埋獎勵食物。 遲少少再講下唔食野既狗。 (後補：點解狗仔會鍾意拆散來食多過成舊過呢？其實佢地 overall 都大約會知道自己食左幾多野的，不過如果你重覆得多又幫佢拆散左，佢地就可以食好多呢次種美味。不過如果有時做得一兩次既練習或得閒食下呢，就唔好咁沽寒喇。佢地知架，你試下剩係比粒米佢食，再睇下佢地望住你個樣，你都覺得唔好意思架。）