認識狗狗垂直跳的原因
早前分享左一段網上段片，講緊狗仔長期垂直跳有機會對佢造成嚴重傷害，重則可以下肢癰瘓。一般狗仔身體結構並唔預佢會垂直不停跳的，所以長期咁樣跳條腰同後腳就會出事。
咁要點樣「制止」？不如換個講法，我地唔好諗制止佢做呢樣野，而係令佢唔做呢樣野，而搵一樣替代既行為去代替跳呢個行為。
首先，你要理解一個真理：Dogs do what works。即係狗仔只會做有意義既野同埋行得通有回報既行為，而唔會食飽無無野做浪費自己既體力同埋時間。然後，你要理解狗仔到底點解會跳﹑咩情況下會跳﹑跳完佢會得到乜野後果。當然我地講緊既係一般係咁跳類似扭計既情況，如果你隻狗係因為想攻擊而不停垂直跳的話，咁就係另外一樣野了。
一般狗仔係咁跳跳跳跳跳，都係佢地有野想要，而且佢地曾經唔止一次試過跳完真係 work，跳完真係得到佢要既野。
＝＝一般狗仔會不停跳既原因＝＝
狗既天性就係想要一樣野就接近佢：
－佢想同你打招呼親近你，佢就會想法子接近你塊面； －佢想食你手中既野食，佢就會覺得跳起就會得到； －有部份被養成超鍾意被抱既狗，當然跳起就會接近主人懷抱。
上面幾個例子都係物理性質的，純粹想縮短佢同埋想要既野的距離。當然都有比較內在的可能性，就係佢想主人關注既時候佢就會不停跳跳跳令自己既動作變得顯眼。然後當主人無論係覺得佢可愛﹑煩厭或者打算鬧到佢停既時候，佢就已經得到佢需要既野。
＝＝咩情況下會跳跳跳＝＝ 你需要留意狗仔咩情況下會跳，例如：
－當你入屋時 －當你手上拎住野食時 －當你準備開飯比佢食果陣 －當你準備同佢去街 －等等啦…
＝＝千祈唔好用的處理方式＝＝ 一般狗主可能會打或鬧或用其他工具阻嚇，但假如有效的話狗仔已經唔會跳了，仲洗乜再鬧同睇呢篇。通常鬧極都無用，只有自己勞氣。不過今次講緊既唔係唔好用打鬧。
可能會有人教你：佢跳咪由得佢跳唔好理佢，跳到佢唔跳為止。呢個做法叫做 extinction，即係比佢無限跳跳到覺得件事唔 work 然後就無左個行為。理論上係正確同埋可行，但實際上基本上係接近100％ 唔會做得到。而更大既可能性就係下面既情況：
佢跳左一輪，覺得無用，會抖一抖。抖完，佢會繼續跳，跳得更勁更高，甚至加埋吠。跟住主人就會開始覺得佢好煩，然後由得佢，或者鬧佢，或者理佢，或者錫返佢。呢一個情況學術少少就叫做 extinction burst。
然後當主人係唔知千百次試煉裡面，有其中一次失守的話，咁就HIH喇。隻狗以後就會越跳越勁，然後佢地就更加會學識一個道理：唔係跳唔work，而係我跳得唔夠high！
所謂的完全忽略法，唔好亂咁用。對人對狗都唔係好事，而且會令件事更加麻煩。
＝＝可自行嘗試簡單訓練方法＝＝ 呢篇都好多字了，留返下篇，賣個關子。但認真睇左上面先啦，有用的。XDD
