輕微分離焦慮系列 - 4

有無人既狗平時識得去廁所完全無問題，但人一出左街返來就見佢屙到亂晒龍？呢個都係其中一個值得留意既野，亦係好多分離焦慮狗狗常見既情況。 有唔少主人都停留係一個比較傳統或擬人既諗法：「佢肯定係怪我地出左街唔理佢，特登亂咁屙想激死我地。」狗其實係好聰明，但絕對無咁聰明同攻心計的。如果真係咁攻心計，就唔會有咁多人鍾意狗。 通常成犬會突然亂咁屙尿，首先要排除身體狀況，其次就留意係咪有其他壓力來源令佢地不自控地屙錯。而分離焦慮既狗，就會係主人離開左之後好驚就會有呢個問題。 所以如果見到你既狗無人時會亂屙，不如好好了解到底係邊部份出左問題，對大家都會好少少。盲目以任何訓練方法企圖糾正呢一類亂屙既情況，其實都唔係好事，無論你係用打鬧既方式，或所謂比較正向既方式都一樣。唔係解決緊佢背後既成因，只專注要解決唔比佢亂屙，其實都唔見得令狗變得舒服。 輕微分離焦慮一般好難分辦係普通問題﹑少少驚﹑定係真係初期分離焦慮症。所以要靠主人多留意，會唔會係人離開左屋企之後，佢地有之前講過既問題。如果中兩樣以上，而又有持續或變差既傾向，就一定要更加留意了。 至於好多人都會直接問：咁要點做？ 好老實，好難就咁答你，如果留個comment 就答到，呢門就唔會係一個專科，亦唔會係令全世界幾百萬狗仔受苦既一個病。 純粹少少緊張或痴身既狗，或做預防就簡單，之後都會出 post 講少少。但一旦演變左做分離焦慮症，咁就唔會咁易同咁快可以處理到了。點樣界定佢係病症定係一般焦慮？ 同人既精神疾病一樣，比較外行既講法需要有兩個條件： 1. 長期而且持續 2. 影響正常生活 再準確少少，用返 DSM-V 既 definition : "A mental disorder is a syndrome characterized by clinically significant disturbance in an individual's cognition, emotion regulation, or behavior that reflects a dysfunction in the psychological, biological, or developmental processes underlying mental functioning. Mental disorders are usually associated with significant distress in social, occupational, or other important activities." 唔係話 hardsell，但如果肯定真係自己隻狗受分離焦慮症既影響又想處理，真係要預左大量既時間﹑精神同埋可能會用到唔少既錢。有呢個覺悟，先再決定搵邊個幫手都未遲。但好肯定，去到中度或嚴重分離焦慮，一般主人唔會自行搞得掂，亦唔係每一位 trainer 都願意同識得處理。 香港我暫時認知肯做同識得做分離焦慮既訓練師應該唔太多。之後都可能會做個 listing。有興趣而又覺得自己得既行家，都歡迎PM 會加埋落去的。 黎緊我都希望等多少少人認識分離焦慮，所以大家唔介意的，可以幫手將 message spread 開去，感謝呀。 :)