六個教狗狗去廁所的要訣
有一部份主人尋求專業人士協助既原因，都係因為唔識教狗狗去廁所或者想有人幫佢教去廁所。其實訓練師上門教去廁所好多時都係乜都做唔到的，最多只能將以下寫既野真人咁講一次比你聽再切合返你個環境教你點樣set。好多時遇到想搵心幫手教廁所既，我都會比文章佢睇，睇完就嘗試下先。咁我索性整理好，之後有人問都可以再比佢地睇～
除左幼犬以外，如果成犬去廁所既模式突然有變的話，記得記得記得，一定一定一定，首先要同佢去睇左醫生先。因為好大機會係因為身體問題而「犯錯」。如果因為唔舒服屙錯仲要比人鬧或罰，咁就真係好陰公！然後就要排除係焦慮問題：如分離焦慮等引起既亂屙。
1. 去錯廁所一定唔可以鬧（同打）！
狗狗學習往往只係透過間單既 ABC 原理，即係環境有乜﹑做左乜﹑然後會得到乜野後果去理解。
假如狗狗屙錯左又再比主人打鬧，特別係唔可以當場斷正既情況，好多時狗狗好快就會學識有人在場果陣係唔可以屙﹑甚至係屙完就食同飲晒屎尿！因為佢地理解到既就係：
主人存在 ＋ 有屎尿存在 ＝ 會無啦啦比人打鬧
假如唔好彩學識左呢個規律，咁佢地好快就會知道無人果陣屙或只要唔好比人發現＝無事，或者屙完清左佢都會無事。呢個情況就叫做 reverse training，可以理解為越教越衰。一旦出現左，你就好難修正，因為好多時狗仔死都唔會係主人面前屙，你想捉佢做岩都捉唔到。
比較理想既做法就係狗仔屙錯之後完全當無事發生，自己靜雞雞清潔乾淨就得。咁就可以避免埋唔小心增強因 attention seeking 既屙屎尿。
2. 建立一個接近100％ 會做岩既情境
以幼犬黎講，一般幼犬去廁所都有一定規律：每幾個鐘頭尿一次﹑每次食完飯後會開大／細﹑每次跑左一輪後會開大細﹑有困籠既可能每次放出黎佢都會即刻屙等等…
主人首先要掌握到佢地大約廁所既規律。時機到左，就將狗狗放去一個你想佢去廁所既空間，睇住佢又好，困一困住佢都好，等佢屙岩之後，讚一讚佢再放佢出來玩同食下好野。初期可以將尿片的範圍鋪大少少，掌握後再逐漸收細變回正常，狗狗初期學習既挫敗感會無咁大同學得快少少。
有部份幼犬，同埋幾乎絕大部份既成犬，當你擺佢去特定空間後佢係可以同你鬥忍唔去廁所的。呢個時候其實只要同佢鬥耐性等到佢屙就得了。頭一兩次可能真係等到天荒地老，但做到一兩次成功再配以極大獎勵之後，下次就會超快。
假如係成犬重新學習去廁所，好多時只需要1－3次去岩然後有大獎的經驗，佢地就好快可以理解到要點做並且修正好。
因為尿就得咁多，假如佢地知道屙岩尿可以換黎更好既野，就會好好珍惜佢既尿減少亂屙。當然因焦慮或健康問題而亂屙既另計。
3. 盡可能減少狗狗犯錯的機會
幼犬因為忍耐力比較差，初期不太適宜係沒有限制活動空間閎情況下活動太耐。一般幼犬的忍尿能力大約係 （月份）正負一小時，即係3個月的幼犬大約可以忍耐2－4小時尿尿。假如狗狗大約到左需要廁所既時間但又未去到的話，記得限制返佢既活動範圍同擺佢去返正確既地方。
如果係成犬需要重新修正的話，主人初期可能要密切留意並阻止狗狗有去錯廁所既情況發生。可能可以叫佢同你留係同一間房，或一齊出出入入，總之就唔好比機會佢犯錯。然後周不時帶佢去適當地方嘗試廁所即可。
4. 可以利用誘導劑或其他狗狗的尿液作誘導
部份狗狗對寵物店能買到的誘導劑會有反應，可以吸引他們增加在刻處屙尿的機會；而利用其他狗狗的尿液則會有更多狗有反應。當然都係有少部份係完全唔理的。
兩者既原理都係利用尿液中既味道同費洛蒙，引發狗狗霸地盤既天性係上面尿尿。主人只需要準確等待狗狗屙完馬上讚美並給予大獎即可。
有人講過，隱隱若若來得比赤裸更誘惑。無論你是利用誘導劑或其他狗狗的尿做誘導，可以嘗試在一張尿片上沾上氣味，然後在上面放一張全新的尿片。咁樣成功率會高好多同埋會避免有潔癖既狗唔肯上去既問題。
5. 獎勵要吸引和時間要準確
有部份主人反應過，教左好耐都只係教到狗狗踩上片而唔係係上面屙，呢樣就係 timing 既問題喇。
正確既做法，應該係狗狗上左片屙，屙完晒再馬上讚美並給予獎勵。有部份主人非常期待同緊張，一見到狗狗上片準備屙就讚定先，然後狗狗屙都未屙就走左過黎搵你拎野。
至於獎勵，一般可以用好吸引既野去做都得。可能係好日都無得食既正野食多少少，或者同佢盡情玩返5分鐘，都係一個好理想既獎勵。
狗狗去到中期，可能會分好多次去廁所，每次屙少少。呢個時候都可以保持獎勵，等佢加強返屙岩＝有獎呢個概念。
到廁所模式穩定之後，可以慢慢唔再用咁多獎勵，間中獎下又得，讚下又得；當然唔好一世都唔再獎啦，明明人地做岩就咁乖。
6. 廁所擺位要合理
廁所既擺位，最好就唔好太開揚，起碼都有一邊靠牆會最理想。另外就係盡可能將食水同埋廁所分開擺放。假如主人係利用圍欄或籠的話，首先要確保圍欄或籠唔會太細，然後就盡量將食水同廁所一頭一尾咁擺放。
一黎正常都唔會有生物鍾意係自己尿則邊飲水，二黎分開都無咁易污染水源引起不必要既疾病。
同埋初期盡可能唔好轉廁所位置，因為會令狗狗覺得無所適從而有機會又做錯的。
