我該如何制止我的狗吠叫或咬人？

呢個我諗都係好多人想問，好多人已經上網問左，或大部份搵我做訓練既主人一開始都好急問既問題。

不要問「我應該點樣制止佢吠」﹑「我應該點樣停止佢惡」，試著問「佢點解會吠」或「佢點解要咬人」。

撇除特登教到佢吠或咬人既情況，好大部份既吠叫或攻擊都係反映情緒既行為。要係佢地激動到吠叫或作出攻擊時，要佢冷靜唔可以郁，一來唔係太實際，二來就算比你做到都未必會係一件好事。

情緒出現，就必需要抒發，假如你用高壓強硬手段封左呢個 outlet，佢自然會係第二D 地方出現。可能係變左其他行為問題﹑或精神疾病﹑或用身體疾病去反映。人類都有的，身心症，Psychosomatic disorder，都係因為心理因素而生既健康問題，做任何檢查都做唔到但佢的確會有問題。

養狗，你講緊既係同另一物種相處。你需要去了解佢地，理解佢地既習性行為模式。假如你明白佢點解會吠﹑會咬，咁你就算唔識得幫佢處理，都應該可以用常識去避免或者幫佢抒緩一下。

經常見到有養細狗的因為狗吠，走去幫佢戴口罩﹑彈嘴﹑大聲鬧等等… 結果到最後換黎既都係越來越衰，主人都越來越激氣。

亦都有唔少護食護物既主人，企圖用懲罰打罵方式，宣示主權又好，宣示地位又好，諗住罰到隻狗唔敢咬人又好，諗住話比佢知咬人唔岩都好，搞搞下到最尾係越來越差的。當然有部份個性較弱既狗係會屈服。

有時我會寫好多知識上概念上既分享，都唔代表你問乜我都可以完全免費解答或上網話你知的。特別係有攻擊性或驚慌既狗，就咁講的話係好唔負責任既事。

一來我唔知隻狗個情況，二來我就算問主人，佢都未必真係知道隻狗個情況。

假如你既狗有唔同既行為問題困擾緊你，而你唔識處理又唔係太理解佢地的話，請盡早尋求專業協助。