環境管理的重要性

行為改變訓練要成功，基本上一定係要環境管理配合訓練去進行，特別係攻擊行為。只係單靠管理或訓練，比你做到一半效果已經好叻了。有班人會恥笑做管理控制係斬腳趾避沙蟲，唔敢直接面對個問題，去逃避。逃避雖可恥但有用OK？

羅馬唔係一天建成的，而所有行為改變既學習都唔可能一日做成。佢有一個習慣或行為模式都幾個月甚至幾年了，你唔可能要求佢係一日甚至幾日內完全扭轉，假如你可以三日內由零開始學日文學到 native speaker 咁流利的話，你就有資格咁樣要求。但事實係唔可能。

唔管理會點？就會變左一啖沙糖一啖屎。舉個例，護物既，你一邊由零開始慢慢教佢唔洗驚﹑我拎走你隻骨都唔會有問題甚至會更好；但另一方面你又不停係佢真係食緊骨時令到佢緊張到爆錶去攻擊。咁到底你係想佢學唔洗驚定係應該繼續驚？

任何動物學習唔好﹑自保既野一定係快過學好野好多倍的；更何況係一個已經有一段歷史既自保行為。

而另一樣野，就係點解攻擊行為一定一定一定一定要做好環境管理盡可能將 trigger 既次數減到零？因為每次狗一激動進入 fight or flight 的反應時，身體會有大量腎上腺素分泌，令佢地準備好隨時進行 fight / flight 相關既行為。而呢類荷爾蒙變化，一般都需要好幾日平伏先可以完全回復正常水平。假如佢未平伏，又激多次，只會不斷累積，然後狗仔亦會長期處於呢個狀態。

腎上腺素本身會令心跳加速﹑增加肌肉血液供應準備動物隨時做野；然後佢亦都會激活左負責應對威脅既交感神經系統；最後佢仲會令中央神經系統處於一個最適合做出攻擊或逃走既模式。

狗仔唔做好環境管理，就只會越來越緊張越來越敏感易爆；越緊張既狗，學習就會越慢而且難度會越高。

環境管理並唔係斬腳趾避沙蟲，而係好確實的為狗仔預備一個平穩安定既心情同埋環境，去學習新既模式。