繼續聲音敏感

今日想講既係對聲音敏感或恐懼，Sound Sensitivity / Sound Phobia。其實兩者係同一樣野，但係程度之分，sound sensitivity 即係對聲音好敏感﹑會非常留意唔同既聲音﹑然後對聲音感到焦慮或緊張甚至少少驚；而sound phobia 的話即係 sound sensitivity 既進階版，係驚聲驚到痴線果種。

有部份狗天生完全唔理聲音或者有適當社會化後，都會對聲音完全無事的；但有一部份就天生會對聲音敏感。而敏感既呢部份，有一部份比較好彩既就只會怕特定聲音，有一部份就會對所有聲音都敏感，呢樣係最難處理的。

如果初養狗仔，無論係 BB 或領養成犬的話，留意到佢地對聲音特別敏感而你屋企又長期有唔同聲音的話，最好就盡快處理。因為呢樣野可大可少，比較忍受到既狗或無其他問題既狗，可能只會比較細膽驚青；但萬一不肯有任何攻擊相關既情況，就會因為聲音惡化得極快而且好唔穩定。

目前主要做既攻擊個案… 差不多90％ 都有唔同程度既聲音敏感…

有唔少都係因為狗仔對聲音敏感，主人留意唔到，然後屋企長年都有唔同程度既聲音如街外聲﹑門外鄰居聲音之類… 慢慢就令佢地再唔能夠放鬆。長期繃緊既狗少少野就會爆發了。

最後舉個例… 如果你聽到尖野刮金屬果種高音枝枝聲會起雞皮的話… 你話你好驚果種聲又唔係，但果種聲的確影響緊你。雖然唔係太驚，但假如又有個痴線佬24小時都不停係到刮，果種感覺都幾恐怖的。然而對一隻聲音敏感既狗黎講，個情況就正正係咁樣。

如果有勇士想挑戰的話，戴 headphone 連續播呢條片聽10分鐘試下，包你心跳加速。你聽既只係10分鐘，但對聲音敏感既狗係聽緊一日24小時，一年365日。

https://www.youtube.com/watch?v=OtJ44FyB570