Ian Dunbar’s Dog Bite Scale

最近因為湊女同準備考試，所以都好少update，今日趁得閒，將之前係另一個 group 寫既野整理返落網站先。

今日講下比狗咬既程度，雖然香港獸醫同埋 trainer 唔係太流行用呢一套，但呢套其實都算係比較容易量化「咬傷」既程度。歐美地區既獸醫同埋訓練師每每遇到狗咬人／狗咬狗既個案果陣，都會用呢個表做參考。

成日見人話比狗咬﹑隻狗咬我﹑比狗咬傷﹑隻狗咬其他狗等等… 其實所謂咬﹑所謂傷，好難介定。同一個傷口，有人覺得好嚴重﹑有人覺得無乜野，有人覺得咬人隻狗有問題好惡，有人都可能睇得出未必係咁惡純粹係其他意外因素加埋令件事望落好差。咁點樣去睇呢次咬傷大唔大獲呢？

Ian Dunbar 就用左呢個方式去分類 level 1 – 6。通常去到 level 4 既狗就要開始留意，level 5 甚至係6就一定係危險。

---

幾個月大既狗仔成日追人手腳咬，果種其實叫做 play biting，係佢地學習緊點樣用力同點樣玩既階段。有唔少主人會直接用唔同方法去「罰」或者阻止，但其實未必係一件好事。

有樣野叫做 咬合力控制 (Aquired Bite Inhibition, ABI)，有一半係天生已經係咁，有另一半係要經過 play bite 階段不停練習學返來的。

好多時如果狗仔一咬就唔準，佢地只會學識 可以咬／唔可以咬。 相反如果係慢慢教佢細力，最後先唔準咬，中間可能加返少少遊戲同埋規則，咁樣隻狗最後學識既就會係 Yes / No + Soft / Hard Discrimination。

可能有人話：我隻狗好乖唔咬人，有乜所謂？

一隻幾乖既狗總會有咬人既機會同時間。隻狗因驚慌﹑受傷﹑唔舒服﹑被挑釁等等，都總有機會開口咬，呢個時候就見真章了。不過，始終 ABI 有一半都係來自先天，所以做左唔包一定輕力，但做左一定比無做好。 共勉之。